Friday, July 16, 2010

Lagay ng panahon

PAGLALAKBAY ng kalakal at balana, pangisdaan at pagsasaka—sa mga marahas na pihit o mahinahong usad ng panahon nakasalalay ang mga ito.

Hindi mga larong pagsusunugan ng utak o taltalan sa Facebook ang may pinakamalaking bulto ng naghahalungkat sa Internet— lagay ng panahon ang talagang inaalam… ‘hirap kasi sumalunga sa buhos ng unos lalo’t sa bahaging bundok maglilipat-puno o pananim… ‘hirap magpalipad ng saranggola o kahit barko sa halihaw ng bagyo.

Hindi naman pala dapat umasa sa PAGASA—mas asenso pa nga ang “Eat Bulaga” na may domestic satellite para maikalat at ipaalam saanmang lupalop sa Pilipinas at kanugnog na mga bansa ang wasiwas-balakang at yugyog-niyog ng EB Babes… aba’y makikita halos araw-araw na binabayo yata ng bagyo ang mga naturang tagasayaw.

Kaya naman mas tinatangkilik, marubdob na sinusubaybayan ng mga miron saanmang kuyukot at kili-kili ng bansa ang naturang palatuntunan kaysa maayos na paglalakbay, pangisdaan at pagsasaka.

Kaya naman dumadagundong ang katkat ng alipusta, pagmumura ng balana at garalgal-tungayaw ng power generating sets kay Oscar Reyes ng Meralco nang bumayo sa Metro Manila, lalo na sa mga taga-Makati si Lola Basyang—hindi po siya kamag-anak ng mandudulang Severino Reyes.

Lumilitaw na may kasuklam-suklam na sabwatan ang pamunuan ng Meralco (na nagtaas na naman ng singil sa kuryente) at mga gasolinahan… mauungkat na kauupo lang ng Reyes sa Meralco pero naging tagapangulo siya noong dekada 1990 sa Pilipinas Shell… at lubusang tumipak ang mga gasolinahan sa masiglang bentahan ng diesel fuel upang mapaandar ang power generating sets, upang makapanood pa rin ang mga masugid na tagasubaybay ng “Eat Bulaga.”

Hindi na baleng offline ang mga computers ng Metro Manila lotto outlets at naunsiyami na naman ang mga nangangarap buhusan ng kumukulong mantika’t maging Lucky Me instant mami … hindi na baleng milyong pasahero ng LRT at MRT ang nakunsumi dahil walang masakyang tren… hindi na rin baleng nalumpo yata ang mga bahay-kalakalan sa Ortigas, Binondo, Quezon City at Makati’t umaabot sa bilyones ang lost business opportunities

Pero the nation’s most-watched noontime show must go on! Kailangang ibigay ang hilig. Paglingkuran ang mga moron, oops, miron—na itinuturing na boss ni P’Noy.

Hayaan sa kanlungan ng panghihinayang umalulong ng awit sina Rom Dongeto at Noel Cabangon—“pana-panahon ang pagkakataon, maibabalik ba ang kahapon?”

T-teka, binanggit kay Manang Mae ng National Press Club na sa Roma’t ibang maunlad na siyudad sa ibang lupalop, nakalatag sa ilalim ng lupa ang mga kable’t kawad ng kuryente… hindi naman problema sa materials development ang superconductivity ng kawad na dadaluyan ng kuryente… hindi rin hadlang sa materials development ang paglikha ng pambalot na insulasyon sa mga kawad para ligtas sa sanaw ng baha, kumukulong putik kahit yanig ng lindol…

Pangit sa paningin ang hanay ng mga poste na pinagsasampayan ng mga kawad-kuryente at binibilang ng mga naghahanap ng mapapasukang trabaho… kailangan pa ring hindi basta maabot ang mga kawad—at presyo ng singil sa kuryente—ng mga magnanakaw at kawatan…

4 comments:

紹函紹函 said...

來給你加油,幫你推一下喔~期待你的下一個更新,謝謝............................................................

陳登陽 said...

有夢最美啦~~加油!元氣滿點!...............................................................

王美妹 said...

在莫非定律中有項笨蛋定律:「一個組織中的笨蛋,恆大於等於三分之二。」. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .

蔡舜娟蔡舜娟 said...

Necessity is the mother of invention.......................................................................